Поиск

Авторизация



Опрос

Оцените мой сайт
 
Бас бет Мақала

Мақала

ДҮНЬЯ БАЗАРЫНА ЖОЛ

Бүгинги күнде мәмлекетимиздиң барлық аймақларында өндирис ҳәм санаат кәрханаларының жумысларын және де жетилистириў, сырт ел инвестицияларын тартыў тийкарында заманагөй техника ҳәм технологиялар менен тәмийинлеў бойынша көлемли ислер әмелге асырылмақта. Усы ис-илажлар нәтийжесинде республикамыздағы бир қатар кәрханалар тәрепинен халықаралық стандартлар талабына жуўап беретуғын өнимлер менен товарлар ислеп шығарылып, мәмлекетимиздиң экспорт потенциалы жыл сайын артып бармақта.

Бул жөнелистеги ислердиң нәтийжелилигин және де арттырыў мақсетинде Өзбекистан Республикасы Министрлер Кабинетиниң 2014-жыл 24-декабрьдеги сапаны басқарыў системаларын енгизиўди муўапықластырыў бойынша арнаўлы исши топар жыйналысының баянламасы тийкарында Бас министр орынбасары тәрепинен республикамыздағы санаат кәрханаларында халықаралық стандартлар талапларына муўапық болған сапа менеджмент системаларын 2015-2017-жылларда 62 кәрханада бас­қышпа-басқыш енгизиў бағдарламасы тастыйықланған еди. Усы бағдарлама тийкарында «Ўзстандарт» агентлигиниң Қарақалпақстан Республикасы сынаў ҳәм сертификатластырыў орайы мәмлекетлик кәрханасы тәрепинен республикамыздағы 32 кәрханаларда О’zDST ISO 9001:2009 стандарты талапларын енгизиў ислери алып барылмақта.

Нәтийжеде, бүгинги күнге шекем 21 кәрханада енгизилген сапа системасы аккредитация­ланған сертификатластырыў мәкемелери тәрепинен халық­аралық стандарт талапларына муўапық деп табылып, сертификатластырылды. Булардан «Jayhun Delikates» ЖШЖ, «Ustyurt Sulfat Natriy», «Бустан тальк», «Нукус-Реммаш», «Нукус Электрон Жихозлари», «Qoraqalpoq qishloq qurilish Servis», «Беруний тальк», «U’y Jay Qurilis», «Propilen Alisher» жуўапкершилиги шекленген жәмийетлери ҳәм «Емберген Алламбергенов», «Даниярбий», «Дослық» жеке фирмалары сапа системасы сертификатларын қолға киргизди.

— Буннан тысқары орайымыз қәнигелери тәрепинен халық­аралық стандартлар талаплары тийкарында сапа менеджмент системаларын енгизиўдиң әҳмийети жөнинде кең түсиник жумысларын алып барыў нәтийжесинде Бағдарламаға киргизилмеген 5 кәрханалар менен ықтыярлы түрде шәртнамалар дүзилди. Солардың қатарында сентябрь айында жуўапкершилиги шекленген жәмийети түриндеги «AMUDARYO TEX» Өзбекистан-Уллыбритания қоспа кәрханасы да сапаны басқарыў системасы сертификатластырыў аудитинен жақсы нәтийжелер менен өтип, сертификатластырылды,-дейди «Ўзстандарт» агентлигиниң Қарақалпақстан Республикасы сынаў ҳәм сертификатластырыў орайы мәмлекетлик кәрханасы сапа системаларын енгизиў бөлими баслығы Бахадыр Сапаров.

Жақында халықаралық стандарт талапларына жуўап бериўши сертификатты «AMUDARYO TEX» қоспа кәрханасы жәмәәтине тапсырыў мәресими болып өтти. Оған «Ўзстандарт» агентлигиниң Қарақалпақстан Республикасы сынаў ҳәм сертификатластырыў орайы мәмлекетлик кәрханасы басшылығы, кәрхана басшы ҳәм жумысшы хызметкерлери, ғалаба хабар қураллары хызметкерлери қатнас­ты. Соң илаж қатнасыўшылары кәрхананың жумыс ба­рысын көзден өткерди.

«AMUDARYO TEX» республикамыздағы ең ири санаат өнимлерин ислеп шығарыўшы жаңадан шөлкемлестирилген кәрханалардың бири есапланады. Кәрхана 2014-жылы шөлкем­лестирилген болып, ийирилген жип шығарыўға бағдарланған. Бүгин бул жерде 450 ден аслам исшилер жумыс алып бармақта ҳәм олар тәрепинен ислеп шығарылған өнимлер Молдава, Россия, Қытай, Түркия, Польша ҳәм Беларус мәмлекетлерине экспортқа жиберилмекте.

Кәрханада тийкарынан сырт ел компанияларының ең заманагөй компьютерлестирилген технологиялары орнатылған. Булардың арасында Германияның «Тручлер», Италияның «Марзоли», «Савио» фирмаларының ең жоқары технологиялары бар.

Әлбетте, бул кәрхана жәмәәтиниң қолға киргизген үлкен жетискенликлериниң бири десек болады. Себеби, сапа менеджмент системасын ислеп шығыў, енгизиў ҳәм сертификатластырыў бәсекиликти арттырыўдың тийкарғы шәртлеринен бири есапланады. Бул сертификатқа ийе болыў кәрхананың халықаралық стандартлар талапларына муўапық жумыс алып барыўын тастыйықлайды. Сондай-ақ, халықаралық стандарт талапларына жуўап беретуғын, дүнья базарында жәҳәнниң ири компаниялары менен бәсекилесе алатуғын өнимлери елимиз экономикасының раўажланыўына салмақлы үлес қосатуғынлығына исенемиз.

Р.АРЗИЕВ.

«Бүгин биз демократиялық процесслерди тереңлестириў, халықтың сиясий белсиндилигин арттырыў, пуқаралардың мәмлекетимиздиң сиясий ҳәм жәмийетлик турмысындағы әмелий қатнасы ҳаққында сөз етер екенбиз, әлбетте, мәлимлеме алыў еркинлигин тәмийинлемей, ғалаба хабар қуралларын адамлар өзиниң пикир ҳәм идеяларын, жүз берип атырған ўақыяларға өзлериниң мүнәсибетин ҳәм позициясын еркин билдиретуғын минберге ерисип болмайтуғынын жақсы билемиз.

Бәршеге мәлим, пуқаралардың мәлимлеме тараўындағы ҳуқық ҳәм еркинликлерин тәмийинлеў мәселеси инсанның мәлимлеме алыў, мәлимлемени ҳәм өзиниң жеке пикирин тарқатыў ҳуқықы ҳәм еркинлигин өзине жәмлеген болып, бул Өзбекстанда демократиялық жәмийет тийкарларын қурыўдың әҳмийетли шәрти, керек болса, тырнағы болып есапланады».

Ислам Кәримов

 

Архив

2017
Октябрь
ПнВтСрЧтПтСбВс
      1
2345678
9101112131415
16171819202122
23242526272829
3031