Поиск

Авторизация



Опрос

Оцените мой сайт
 
Бас бет КӨРКЕМ ӨНЕР

КӨРКЕМ ӨНЕР

ЫҚЛАСЫНА БЕРГЕН БАҚСЫ

Өзиң менен зәңгилес болып, күнде көз көрип жүрген адамыңды бирден қағазға салып жазып кете бериў мүшкил екенлигин енди сезингендей болдым. Өйткени, бираз жылдан берли бақсы Әжинияз Абибуллаевты телевидениеден көрип, радиодан қосықларын еситип, той мерекелерде атқарып жүрген бақсышылық өнериндеги жанға жағымлы қосықларын тыңлап ҳақыйқый бақсы болып жетилисип киятырғанлығына гүман етпейсең.   Оны дәслепки сәўбетимизге тарт­қанымыздан-ақ, «мен еле бақсышылық өнерин меңгергеним жоқ, еле шәкирт басқышындаман» деп өзиниң кишипейиллигин көрсетти.

Ҳаслы шоманайлы Әжинияз балалықтан баслап-ақ, мийнет сүйгиш болып өсти. Қатарынан алық, жаслығынан дуўтаршылық өнерге қызығыўшылығын сезинген әкеси, тәжирийбели муғаллим Ғайбулла аға оны 6-7-класс ўақытларынан баслап бақсы Базарбай Қәлменовқа шәкиртликке берди. Мектепте оқып жүрип Әжинияз устазлары Базарбай Қәлменов, Қуўаныш Хожаниязовлардан бир неше намаларды үйренип, ҳәр қыйлы таңлаўларға қатнасып жүрди. Мектепти табыслы тамамлап, Нөкистеги Ж.Шамуратов атындағы мәденият ҳәм көркем-өнер колледжине оқыўға тапсырады. Ол жерде устаз бақсылар Ғайрат Өтемуратов, Теңел Қәллиев, Мақсет Әйекеевлерден бақсышылық, саз шертиў өнерлерин тереңнен үйрене баслады.

Колледжде алған билимлерин Әжинияз атындағы Нөкис мәмлекетлик педогогикалық институтында және де тереңлестирди. Студентлик жылларында Ж.Есбол­ғанов, К.Асқаровлардан тәлим алды.  Әсиресе, устазы, Өзбекстан халық бақсысы Теңел Қәллиевтиң изине ерип, оннан миллий қосықларымыздың, дәстан атқарыўшылық жолларын үйрениўди тоқтатпады.

— Әжинияздың саз ойнаўлары, ырғақлары, баладай жипек минези, ҳәр бир тапсырылған тапсырмаларға жуўапкершилик пенен қарап, булжытпай орынлағаны ушын дерлик барлық устазларының оған болған меҳири бәлент, - дейди устазы, Өзбекстан халық бақсысы Теңел Қәллиев.

Әжинияз ҳәзирги ўақытта Ж.Шамуратов атындағы Нөкис мәденият ҳәм көркем-өнер колледжиниң «Камалат» жаслар жәмийетлик ҳәрекети басланғыш шөлкеми жетекшиси ҳәм бақсышылық өнери бойынша оқыўшыларға бар билимин үйретип атыр. Ол бақсышылық тараўында бир неше таңлаўларға қатнасып, сыйлы орынларды қолға киргизди.

Мәселен, 2010-жылы өткерилген «Дәстан атқарыўшы бақсылар» республикалық таңлаўында Ҳүрмет жарлығы менен, 7-халық­аралық А.Худайшукуров атындағы республикалық фестивалында «Ең жақсы ҳаўаз» номинациясын жеңип алған болса, ал, жақында Қазақстан Республикасының Түркстан қаласында болып өткен 6-түркий халықлар халықаралық миллий қосық атқарыўшылар фестивалына республикамыз атынан қатнасып, шебер атқарыўшылығы ушын Ҳүрмет жарлығы менен сыйлықланып қайтты.

— Қырықтан аслам халық ўәкиллери қатнасқан бул фестиваль жоқары дәрежеде шөлкемлескенлик пенен өтти. Фестивальда мен «Не пайда» намасына И.Юсупов сөзине «Муң қалмас» ҳәм «Кеңес» намасына А.Муўсаев сөзине «Қарақалпақта» қосықларын атқарып шықтым ҳәм бул жыйналғанлар кеўиллеринен жай алды,-дейди Әжинияз биз бенен болған сәўбети барысында.

Әжинияз Абибуллаев бақсышылық өнерин жасларға үйретиў менен бир қатарда колледждиң барлық оқыўшы-жасларына басшылық етип, олар менен жақыннан бирге ислесип келмекте. Ол апрель айында өткерилген «Камалат» жаслар жәмийетлик ҳәрекетиниң 12 жыллығына арнал­ған республикалық жарыста «Ең жақсы «Камалат» жаслар жәмийетлик ҳәрекети басланғыш шөлкеми жетекшиси» номинациясында жеңимпаз атанды.

Ҳақыйқатында да, Әжинияз бүгинги күни өзиниң ислеп атырған жәмәәтинде үлгили устазлардан бири, келешегинен үлкен үмит күттиреди.

Демек, излениўлер жолындағы талпынысларда табыслар жолдасы болсын.

Р.АРЗИЕВ.

«Бүгин биз демократиялық процесслерди тереңлестириў, халықтың сиясий белсиндилигин арттырыў, пуқаралардың мәмлекетимиздиң сиясий ҳәм жәмийетлик турмысындағы әмелий қатнасы ҳаққында сөз етер екенбиз, әлбетте, мәлимлеме алыў еркинлигин тәмийинлемей, ғалаба хабар қуралларын адамлар өзиниң пикир ҳәм идеяларын, жүз берип атырған ўақыяларға өзлериниң мүнәсибетин ҳәм позициясын еркин билдиретуғын минберге ерисип болмайтуғынын жақсы билемиз.

Бәршеге мәлим, пуқаралардың мәлимлеме тараўындағы ҳуқық ҳәм еркинликлерин тәмийинлеў мәселеси инсанның мәлимлеме алыў, мәлимлемени ҳәм өзиниң жеке пикирин тарқатыў ҳуқықы ҳәм еркинлигин өзине жәмлеген болып, бул Өзбекстанда демократиялық жәмийет тийкарларын қурыўдың әҳмийетли шәрти, керек болса, тырнағы болып есапланады».

Ислам Кәримов

 

Архив

2017
Октябрь
ПнВтСрЧтПтСбВс
      1
2345678
9101112131415
16171819202122
23242526272829
3031